Cullitivu Parlemu Corsu, cunfarenza di stampa

9 Mars 2013

"PARLEMU CORSU!" IN DUI PAROLI
Più ch'un associu, "PARLEMU CORSU!" hè un Cullitivu, veni à di, una adunita di parsoni è ancu d'associa, chi tutti si ricunnosscini in a dimarchja di u Cullitivu.

L'ugittivu di "PARLEMU CORSU!" hè di cuntribui à l'ilaburazioni d'una sucità bislingua corsu e francesu, chi passa pà a difesa d'unu statutu di cuufficialità cù un cuntinutu.
Asisti oramai dipoi 6 anni è conta avà piu di 500 parsoni mambra, parechji dicini d'associa è d'urganisimi, adirenti o chi omancu ani cullaburatu à una azzioni in sustenu à a dimarchja di u cullitivu. So dino numarosi i gruppa culturali chi si so impignati daretu u Cullitivu.

Da nutà, chi'ssu nùmaru d'adirenti hè statu rinfurzatu oghji ancu di più, cu l'azzioni ch'è no semu vinuti à spiigavvi.
Intantu, ci tocca à raminta chi u Cullitivu agisci di manera cuncretta à nantu à u tarrenu ("stondi corsi', dibàttiti cù traduttori, cunfarenzi, attella timàtichi, animazioni pà i chjuchi, visiti di musea, cullaburazioni cù u mondu di u sporru...) è dino u Cullitivu rivindichedhja: pitizioni, cunfarenza, cumitati, intervisti, leia cù i lingui minuritarii, "catena umana"...
In 6 anni u Cullitivu hà fattu a dimustrazioni chi u corsu po invistiscia tutti i duminia di a sucità è ci hè una brama pupulara forti par ch'eddu sighi spartu. In 6 anni dinno hà spartu i cuncetta di scoli immirsivi, di furmazioni da giniralizà è u cuncettu stessu di "Sucità Bislingua".

CUNFARENZA DI STAMPA
CORTI 06/03/13
CULLITIVU PARLEMU CORSU!

I nosci mutivazioni:

So trè i raghjoni:
-Par muscià à l'iletti corsi, ancu pronti à sustena unu statutu di cuufficialità, chi a prumuzioni di a lingua corsa hè una brama pupulara è chi a ghjuventù corsa si senti di i più cuncirnati!
-Par fà capi à l'iletti corsi chi'ssu statutu di cuuficialità ùn devi essa biotu di cuntinutu: ùn si po custrui una sucità bislingua cù misuretti!
-Par metti l'iletti corsi davanti à i so risponsabilità: ùn basta à prununciassi pà una cuuficialità di u corsu è di u francesu, ci voli dino à bàttasi par chi u Statu francesu l'accittessi !

Da pricisà: par no, Cullitivu "Parlemu Corsu!", è a dimu dipoi a noscia criaziona in u 2007, ci voli à sèrvassi di 'ssu statutu par piddà misuri ch'ani da tuccà tutti i duminia di a sucità. Un ci pudemu cuntintassi di i sirvizia pùblichi è altri asistituzioni. Par no, una misura impurtanti, hè di metta in piazza una Furmazioni Ubligatoria par tutti l'impresi o i strutturi chi impiègani aienti à nantu à u tarritoriu di Corsica. So i strutturi pùblichi è privati; po essa una scola o un cumerciu è tutti dèvini riceva sopra à piazza una furmazioni rigulari è di qualità. Po essa vistu com'è custrighjanti pà u parsunali è dumandarà ancu cumpisazioni finanziarii par l'impresi ma hè une misuria nicissaria s'è no vulemmu da veru sbuccà à nantu à una sucità bislingua. Di tutta manera hè una misura pruvisoria ancu s'edda hè vera chi'ssu pruvisoriu durarà parechji anni. Durarà u tempu di ritruvà un iquilibriu in a sucità, veni à di, u tempu d'avè i dui lingui a paru. In tutti i casi, hè intruduttu qui a nuzioni di furmazioni à longu andà. Par no, Cullitivu "Parlemu Corsu!", ùn si tratta d'avè isigenzi à cortu andà chi cunduciariani à una pulitica di sclusioni di a parsona ch'un hè cusofuna. Inveci, dopu à anni è anni di furmazioni, in curilazioni cù tutti l'altri misuri di sparghjera di u corsu (scoli imirsivi, media in lingua corsa...) sarà à u cuntrariu naturali d'aspittà i listessi cumpitenzi in corsu è in francesu, par tuttu ingjunu.

Cio chè n cuntemu da fà:
Vulemu rinvià una màghjina pusitiva, quidda d'una mubilisazioni piena di vita è dunqua di spirenza pà a lingua corsa è ancu pà a sucità corsa, indu a lingua ci po avè unu rolu di cimentu unificatori!
Tandu, piuttostu ch'un curteghju clàssicu in carrughju, emu imaginatu di rializà una manifestazioni fistiva o si po di ancu, una "Festa Rivindicativa" !

A NOSCIA PROSSIMA AZZIONI:
UNA MUBILISAZIONI RIVINDICATIVA U 02/03/13

Cullitivu Parlemu Corsu.