Overblog Suivre ce blog
Editer l'article Administration Créer mon blog

 Nuvella tribuna libera di u prufessore Antone Luciani, chi tratta di biastema, di puliticamente curettu è di servilità ...

 

http://i.ytimg.com/vi/PASyq6Dk2go/maxresdefault.jpg


Un zitellone di 17 anni hà imbruttatu a sinagoga di Bastia. A Corsica intera hè cummossa. I persunagi
più riguardevuli -tutta a ghjente « cum’ellu si deve » -si facenu sente, cun voce sulenne. Vergona, a fede di i
Ghjudei hè stata offesa ! Quessa po ùn si face ! A cuscenza universale si rivolta, tutta l’isula è in subbugliu. U
culpevule hè messu à e forche . Capimu iss’impruperii. Ma qual’hè chi averia mai pensatu chì, da una
zitellunata, o una bufalata, si ne saria fattu un cuncistoriu ? Un bastava un calciu à quellu locu , e femula finita ?
Ma innò, ci vulia a ingunfià l’accadutu, e fane una muntagna. E cusì fù. Stampa, radio, autorità civili e
religiose, tutti s’indignonu à più non possu. Tamantu parapiglia per cusì vanu mutivu…


In paragone : una sperta di u Museu Fesch d’Ajacciu, organizatu da a Meria -cù l’accunsentu di tutti i
capizzoni, è l’ammirazione di a burghesia « colta » è di i « snob »-, mittia in tronu un’opera sporca, fatta à
posta da un pittore celebre per inghjulià a fede cristiana è u populu corsu : ùn s’hè intesu un riattu ; tutte iss’e
belle cuscenze si sò ammutulite d’incantu. È quelli chì avianu avutu u stomacu di prutestà sò stati ghjucati à a
risa da una stampa avvilita e trattati di vechji macucchi, o allora chjamati esaltati, estremisti, reaziunarii,
« integristi » è chi ne so eiu ? Cumu si ponu spiegà iss’e duie riazzioni opposte ? Hè bella semplice : Quand’elli
cantanu i ghjalli in Parigi rispondenu i pappaghjalli in Corsica. È, quandu Parigi dà l’ordine di stassi zitti, a
Corsica ùn anscia.

 

http://www.corsenetinfos.fr/photo/gal/pic/gal-2773960.jpg

 

Chì i capipartiti liati a i patroni parigini filinu cum’e bracchi, ùn hè meraviglia : leccanu a
manu chì li dà u buccone. Ma i cusì detti « naziunalisti » ? Aviamu aspettatu altru da parte soia : videndu
ghjucati à a pachjera i nostri antichi, è disprezzatu l’elementu majò custitutivu di a nostra identità, cridiamu
ch’elli s’avissinu da ribellà, - niscentri ch’è no eramu- è risponde à l’offensori « à chì ci cerca ci trova » ;
invece chì si sò stati bassi ancu elli, accinguettati da « Mamma Sò », mansi cum’e muntoni. Ma per l’insultu
fattu à a sinagoga, tandu sì ch’è no avemu intesu i so ronchi ! « E tradizioni corse pruibiscenu simili fatti , è ci
dumandanu di rispettà a tutti ». Soca per elli e « tradizioni corse » ci cumandanu di lascià ghjente scalata da
qual’hè chì sà duve vene à stupacci in bocca in casa nostra ? U veru hè chi ùn anu micca solu ripostu l’arme,
anu ripostu l’onore. Chì disgrazia ! Avemu intesu cù tristezza unu di i so anziani seguaci adirassili,
dicendu : « cridiamu ch’elli fussinu Paladini, è eranu spazzacatini ».A parolla hè spicente , ma timimu di
truvane un’altra. È capimu a so dilusione : ellu s’arramaricava, pensendu a i sacrificii accusentiti pè a patria
corsa, avà dicia, tuttu quessu ùn hè più nunda. Pecura nera è pecura bianca, a chì more more , a chì campa
campa.


Ma issu cuntrastu trà a sorte riservata à a sinagoga è quella riservata à a croce averà o mancu ghjuvatu a
qualcosa : e maschere sò cascate è i mascheroni si sò mustrati. Avà sapemu in manu à quale sò i detti
« naziunalisti ». U naziunalismu corsu hè mortu. Evviva a rinascita naziunale !


Don Antone Luciani

Partager cet article