più di 300 parsonne eranu adunite ss'u 19 di dicembre à u COSEC di Bunifaziu per una serata di sustegnu à u populu sardu, toccu un mese fà da a timpesta "Cleopatra " ( 18 morti, decine di feriti , centinaie di famigle spiazzate ...) . Trè ghjorni dopu à stu scumpientu, era mess'in ballu in Bunifaziu u culletivu " Corsica Sulidarità Sardegna" incaricatu di l'urganizazzione logìstica di l'aïutu ghjuntu di tutta a Corsica.
A serata festiva d'issu ghjuvi era urganizzata da u cumitatu bunifazincu di " Corsica Sardegna Sulidarità" incù u sustegnu di i cummercianti è di a municipalità di Bunifaziu. Eranu prisenti parechji eletti di e cità di Santa Teresa di Gallura, Olbia è d' altri paesi sardi. Una racolta di ghjòculi era dinù urganizzata per u Natale di i zitelli sardi.
Ma d'issa stonda di sulidarità trà dui populi fratelli, un si n'hè parlatu inde a stampa francese di Corsica. Secondu à Ghjuvan'Andria Culioli, unu di l'urganizatori di l'evenimentu è militante naziunalistu, " passatu qualchi ghjorni, i legami di sangue, di storia è di cultura, a sulidarità oghjinca è naturale trà corsi è sardi sarèbbinu puliticamente scurretti" . A stampa francese preferisce fà a publicità di cert'associi vicini à u putère di manca, chi participeghjanu à a culunizazzione di populamentu !! " . Hè detta è ci ramenta chì cume tant'altri affari, l'umanitariu ferma una quistione pulitica ...
A Squadra
Dà leghje dinù annant'à stu sughjettu : http://corsicapatrianostra.over-blog.com/article-sardaigne-nouvelle-orleans-civilisation-et-barbarie-121309057.html